Қирғизистонда Тожикистон ТИВ ходими гиёҳванд моддалар савдосида гумонланиб қўлга олинди

Қирғизистон Республикаси Ички ишлар вазирлигининг Наркотик моддаларнинг ноқонуний айланишига қарши курашиш хизмати (НМНАҚКХ) ходимлари гиёҳвандлик гуруҳи аъзоларини қўлга олди, улар орасида Тожикистон Ички ишлар вазирлиги ходими ҳам бор.

Ички ишлар вазирлиги матбуот хизмати хабарига кўра, “Афғонистондан келиб чиққан йирик миқдордаги наркотикларни Тожикистондан Қирғизистонга, кейин эса Қозоғистонга олиб ўтиш ва сотиш билан шуғулланган трансмиллий гуруҳ”ни аниқлаш бўйича махсус операция тахминан бир кун давом этган. “Жиноят ташкилоти бир нечта таркибий бўлинмалардан иборат бўлиб, уларнинг вазифалари аниқ белгиланган. Гиёҳванд моддаларни сотувчилар махфийлик чораларини синчковлик билан кузатган ва махсус кўрсатмалар олган”, — дейилади хабарда.

Гумонланувчилар Бишкекдаги 1-СИЗОга жойлаштирилди. Ҳибсга олиш чоғида хавфсизлик кучлари томонидан 11 килограммдан ортиқ афюн ва салкам 22 килограмм гашиш мусодара қилинди. Ички ишлар вазирлиги “ушбу гиёҳвандлик гуруҳига алоқадор бошқа шахсларни ва унинг жиноятларини аниқлаш” чоралари давом эттирилаётганини таъкидлади.

Эслатиб ўтамиз, май ойи охирида Ички ишлар вазирлиги Қозоғистон махсус хизматлари билан синтетик гиёҳванд моддаларни ташиш ва сотиш бўйича барқарор каналлар тармоғини биргаликда тугатиш ҳақида хабар берган эди. Икки давлат ҳудудидаги махсус операция, агентлик маълумотларига кўра, олти ой давомида – 2021 йил кузидан бошлаб амалга оширилган.

Ўтган йилнинг декабрь ойида эса НМНАҚКХ ходимлари Қозоғистон Миллий хавфсизлик қўмитаси билан биргаликда трансчегаравий жиноий гуруҳ аъзоларини қўлга олгани ҳақида маълум бўлди

Қайд этилишича, Гумонланувчилар Тожикистондан Қирғизистон ва Қозоғистоннинг турли вилоятларига етказиб бериш орқали айниқса катта ҳажмда наркотик моддалар савдоси билан шуғулланган. 2021 йилнинг ёзида Чуй вилоятида гиёҳвандлик гуруҳининг бир неча аъзоси қўлга олинди. Кейинроқ Қозоғистон ҳудудида гуруҳнинг бошқа аъзолари ва унинг ташкилотчиси Тожикистон фуқароси қўлга олинди.

Aлоқадор хабарлар

Изоҳ